صرت البعيد !
بقلم//جهاد أيوب
جاي وحامل معك هدية العيد
يا ريتك سألت عني قبل ما صرت بعيد
شو نفع طلتك اليوم
وانت من سنين خارج النوم
وحابس الحقيقة بميزانك البعيد ...
جاي تكسر باب الجليد
ثلجك صار بقلبي حديد
روح الله يسامحك
فتش ع مدينة تا تعرفك
تشرد بطرقاتها وما تلتقي بحبيب...
شمسك من زمان غابت
لبست منام الخوف وما عادت
تدحرجت مع ذكرياتك على المجهول
وتجمدت دمعاتك ع خط العرض والطول
بيكفي كذب بيمرق بنص الحكي
بدعساته بهدم المملكه وما بشوف البكي
وبِفخخ النهدات
وبِضيع الأمل مع الغمزات
وبِفزع الخيل
وبِمحي الكلمات...
مفكر أنا ع درج جمراتك بسكب حكايات
وبسامحك وبضحك وبتقبل منك الوردات
روح
روح وما تدق باب الدار
دربك ضاع من تاريخك المنهار...
روح
روح مش ناقصنا شجر مكسور
واغصان صوتها داخل التنور
واضح على حالك عم بتدور
وحدي ناوي تزرع البخور
مسكين ...
ما بتعرف الزمن دوار
ما عاد يرحم
وما بيقبل يسكنك بالدار...
تعليقات
إرسال تعليق